a.ina-ḳhana bhi andoh-e-tamanna nikla
ghaur se dekha to apna hi tamasha nikla
zindagi mahfil-e-shab ki thi pas-andaz-e-sharab
piine baiThe to bas ik ghunT zara sa nikla
phir chala mausam-e-vahshat men sar-e-maqtal-e-ishq
qur.a-e-fal mire naam dobara nikla
dad-e-sha.istagi-e-gham ki tavaqqo be-sud
dil bhi kam-baḳht taraf-dar usi ka nikla
hai ajab tarz ka rahrav dil-e-shorida-qadam
jab bhi nikla safar-e-ishq pe tanha nikla
vo raqibon ka pata puchhne aa.e mire ghar
koi to un se mulaqat ka rasta nikla
dar-ba-dar ḳhvar hue phirte hain ham hijr-nasib
jan-sipari ka bhi kya ḳhuub natija nikla
dil men uThte rahe yadon ke bagule ’tishna’
mujh men simTa hua ik dard ka sahra nikla
Leave a Reply