Jumbish Khairabadi
phuul khilte hi agar paanv men chhale honge
ai junun dasht-navardi ke bhi laale honge
un pe ho ja.enge ta.amir haqiqat ke mahal
ham ne jo ḳhvab kabhi zehan men paale honge
bandagi meri tire dar ki jabin-sa.i hai
mere sajde tire qadmon ke havale honge
muskurata hai har ik zaḳhm dil-e-bismil ka
hans ke qatil ne bhi arman nikale honge
ai baharan-e-chaman vaqt ka ehsas rahe
khil ga.e phuul to kanTon ke havale honge
inqalab aa hi gaya sehn-e-chaman men ‘jumbish’
ab baharon ke bhi andaz nirale honge
Leave a Reply