jism hi pamal ho jaa.e to sar kya kijiye
jaan to ham ko bhi pyari hai magar kya kijiye
dekhte rahiye sahar ke ḳhvab jhuTe hi sahi
mashghala ye bhi na ho to raat bhar kya kijiye
guftugu se rafta rafta ḳhamushi tak aa ga.e
aur harf-e-mudda.a ko muḳhtasar kya kijiye
har nazar turfa tamasha har qadam manzil na.i
sair se fursat nahin milti safar kya kijiye
kaun jaane kitne baazu nazr-e-tufan ho ga.e
phuul phal giniye shumar-e-bal-o-par kya kijiye
jazba-e-abad-kari la.eq-e-tahsin magar
pattharon ke shahr men shishon ke ghar kya kijiye
saḳht-jani apni qismat zang ḳhanjar ka nasib
kashmakash men jaan hai ‘afzal’ magar kya kijiye
Leave a Reply