dekhen ab kya dil-jalon se bol bole jaenge
laag hi se phuut kya dil ke phaphole jaenge
hai yahan paimana mal-o-naqd hi lekin vahan
zarf ki mizan par hi log tole jaenge
mashal-e-mazi dikha sakti hai mustaqbil ki raah
hai ye kunji jis se saare qufl khole jaenge
yaad rakhne ke liye lamhe guzishta vaqt ke
ab kitab-e-mazi ke panne tatole jaenge
tauba tauba kis qadar munh se tapakti hai shakar
is zaban se mithe mithe zahr ghole jaenge
ruuh ki bosidgi ko dafn karne ke liye
dekhiyega badle kis kis tan ke chole jaenge
hai saraha khuub ye paivand-kari ka hunar
rishta-dar-rishta sabhi ab pech khole jaenge
peng badhti jaae amrai men jyuun jyuun din chadhe
shaam hote tak utare sab hindole jaenge
lijiye divan-e-‘naqid’ aap hi ke naam hai
ham kahan in be-tuke ashar ko le jaenge
Leave a Reply