silsile sab ruk gae dil haath se jaata raha
hijr ki dahliz par ik dard lahrata raha
qalb ka daman junun men bhi na chhoda aql ne
dhadkanon ki chaap sun kar mujh ko khauf aata raha
masala us ki ana ka tha ki shohrat ki talab
us ka har ehsan mujh par nekiyan dhata raha
main raha be-khvab khvabon ke tilismi jaal men
vo miri ninden chura kar loriyan gaata raha
sabr ki takrar thi josh o junun-e-ishq se
zindagi bhar dil mujhe main dil ko samjhata raha
roz aa kar meri khidki men mire bachpan ka chand
rakh ke sar ik niim ki tahni pe so jaata raha
hijr ke badal chhate jab dhuup chamki ishq ki
vasl ke angan men bhanvra gul pe mandlata raha
zindagi bebak ho kar tujh se aage badh gai
aur ‘azim’ tu lakiron par hi itrata raha
Leave a Reply