abdul-ahad-saaz

Maine Apni Ruh Ko Apne Tan Se Alag Kar Rakkha Hai

main ne apni ruuh ko apne tan se alag kar rakkha hai

yuun nahin jaise jism ko pairahan se alag kar rakkha hai

mere lafzon se guzro mujh se dar-guzro ki main ne

fan ke pairae men khud ko fan se alag kar rakkha hai

fatiha padh kar yahin subuk ho len ahbab chalo varna

main ne apni mayyat ko madfan se alag kar rakkha hai

ghar vaale mujhe ghar par dekh ke khush hain aur vo kya janen

main ne apna ghar apne maskan se alag kar rakkha hai

is pe na jaao kaise kiya hai main ne mujh ko khud se alag

bas ye dekho kaise anokhe-pan se alag kar rakkha hai

umr ka rasta aur koi hai vaqt ke manzar aur kahin

main ne bhi donon ko baham bachpan se alag kar rakkha hai

dard ki gutthi suljhane phir kyuun aae ho khirad valo?

baba! ham ne tum ko jis uljhan se alag kar rakkha hai

More Poems

Leave a Comment