main ki huun pyaas ke dariya ki tadapti hui mauj
pi chuka huun main samundar ka samundar phir bhi
ek ik qatra-e-shabnam ko taras jaata huun
qatra-e-shabnam-e-ashk
qatra-e-shabnam-e-dil khun-e-jigar
qatra-e-nim-nazar
ya mulaqat ke lamhon ke sunahri qatre
jo nigahon ki hararat se tapak padte hain
aur phir lams ke nuur
aur phir baat ki khushbu men badal jaate hain
mujh ko ye qatra-e-shadab bhi chakh lene do
dil men ye gauhar-e-nayab bhi rakh lene do
khushk hain hont mire khushk zaban hai meri
khushk hai dard kaa, naghme ka gulu
main agar pi na saka vaqt ka ye ab-e-hayat
pyaas ki aag men darta huun ki jal jaunga
Leave a Reply