Na Guman Maut Ka Hai Na Khayal Zindagi Ka

na guman maut ka hai na khayal zindagi ka

so ye haal in dinon hai mire dil ki be-kasi ka

main shikasta baam o dar men jise ja ke DhunDta tha

koi yaad thi kisi ki koi naam tha kisi ka

main havaon se hirasan vo ghutan se dil-girafta

main charagh tirgi ka vo gulab raushni ka

abhi rail ke safar men hain bahut nihal donon

kahin rog ban na jaae yahi saath do ghadi ka

koi shahr aa raha hai to ye khauf aa raha hai

koi jaane kab utar le ki bharosa kya kisi ka

koi mukhtalif nahin hai ye dhuan ye raegani

ki jo haal shahr ka hai vahi apni shairi ka

Leave a Comment