zindagi ka safar ḳhatm hota raha tum mujhe dam-ba-dam yaad aate rahe
meri viran palkon pe din Dhalte hi kuchh sitare magar jagmagate rahe
luT ga.i zindagi bujh ga.e diip bhi duur tak phir na baaqi rahi raushni
is andhere men bhi ham tiri yaad se apni viran mahfil sajate rahe
tum se bichhḌe hue ek muddat hui din guzarta raha vaqt Talta raha
shaam aati rahi dil dhaḌakta raha ham charagh-e-mohabbat jalate rahe
ek tum hi na the varna har chiiz thi chand ke saath thi raat ki dil-kashi
saaz bajta raha lai ubharti rahi raqs hota raha log gaate rahe
yuun na koi jiye jis tarah ham jiye zindagi bhar kisi ko na apna sake
bevafa.i mira dil jalati rahi pyaar ke naam par choT khate rahe
Leave a Reply