Jami Hun Barf Ki Surat Pighalna Chahti Hun Main

Meena Khan

jami huun barf ki surat pighalna chahti huun main

hisar-e-zat se bahar nikalna chahti huun main

diya ban kar nihan-ḳhanon men jalna chahti huun main

kisi ki ruuh ke sanche men Dhalna chahti huun main

juda hoti hi aa.i hai hamesha ‘hir’ ranjhe se

ab is rasm-e-mohabbat ko badalna chahti huun main

main jis miTTi se aa.i huun usi miTTi men milne tak

hazaron baar gir kar bhi sambhalna chahti huun main

ḳhizan ke Dar se ghabra kar palaTna chahta hai vo

har ik mausam men jis ke saath chalna chahti huun main

miTa Daala hai yak-jehti ko is firqa-parasti ne

kisi surat bhi ye surat badalna chahti huun main

main chahti huun ki ban ja.un kisi ki aarzu ‘mina’

kisi ka ḳhvab ban kar dil men palna chahti huun main