Shahzad Anjum Burhani
bharne lagta hai koi zaḳhm to jab puchhte hain
log yuun tujh se bichhaḌne ka sabab puchhte hain
kya tamasḳhur hai bulandi bhi ki ab haal apna
pahle jin logon ne puchha nahin ab puchhte hain
apna paikar nahin pahchan badal kar aao
ye vo mahfil hai jahan nam-o-nasab puchhte hain
husn valon ki ada hai ki jafa hai kya hai
hijr-zadon se ye afsana-e-shab puchhte hain
arzi insaf ki ham ne bhi laga rakkhi hai
dekhiye zill-e-ilahi hamen kab puchhte hain
qadr-danon ki kami hai magar ‘anjum’ sahab
tum nahin hote ho mahfil men to sab puchhte hain
Leave a Reply