ambareen-haseeb-ambar

Sitara-Bar Ban Jae Nazar Aisa Nahin Hota

sitara-bar ban jaae nazar aisa nahin hota

har ik ummid bar aae magar aisa nahin hota

mohabbat aur qurbani men hi taamir muzmar hai

dar-o-divar se ban jaae ghar aisa nahin hota

sabhi ke haath men misl-e-sifal-e-nam nahin rahna

jo mil jaae vahi ho kuza-gar aisa nahin hota

kaha jalta hua ghar dekh kar ahl-e-tamasha ne

dhuan aise nahin uthta sharar aisa nahin hota

kisi ki mehrban dastak ne zinda kar diya mujh ko

main patthar ho gai hoti agar aisa nahin hota

kisi jazbe ki shiddat munhasir takmil par bhi thi

na paaya ho to khone ka bhi Dar aisa nahin hota

More Poems

Leave a Comment