bahadur-shah-zafar

Na Us Ka Bhed Yari Se Na Ayyari Se Hath Aaya

na us ka bhed yaari se na ayyari se haath aaya

khuda agah hai dil ki khabardari se haath aaya

na hon jin ke thikane hosh vo manzil ko kya pahunche

ki rasta haath aaya jis ki hushyari se haath aaya

hua haq men hamare kyuun sitamgar asman itna

koi puchhe ki zalim kya sitamgari se haath aaya

agarche mal-e-duniya haath bhi aaya harison ke

to dekha ham ne kis kis zillat-o-khvari se haath aaya

na kar zalim dil-azari jo ye dil manzur hai lena

kisi ka dil jo haath aaya to dildari se haath aaya

agarche khaksari kimiya ka sahl nuskha hai

va-lekin haath aaya jis ke dushvari se haath aaya

hui hargiz na tere chashm ke bimar ko sehhat

na jab tak zahr tere khatt-e-zangari se haath aaya

koi ye vahshi-e-ram-dida tere haath aaya tha

par ai sayyad-vash dil ki giraftari se haath aaya

‘zafar’ jo do jahan men gauhar-e-maqsud tha apna

janab-e-fakhr-e-din ki vo madad-gari se haath aaya

More Poems

Leave a Comment