ahmad-ali-barqi-azmi

Ro Pada Na-Gahan Muskurane Ke Baad

ro pada na-gahan muskurane ke baad

yaad aai bahut us ki jaane ke baad

meri ankhen khuli ki khuli rah gaiin

vo nazar aaya jab ik zamane ke baad

ruuh parvar tha is ka ye tarz-e-amal

ruuth jaana dobara manane ke baad

dil ko dil se milati hai ye dil-lagi

us ka hona pasheman satane ke baad

talkh-o-shirin hai rudad-e-dil-bastagi

munkashif ye hua azmane ke baad

shakhsiyat ka miri ban gaya ek juz

mere qalb-o-jigar men samane ke baad

hai ye ‘barqi’ hasinon ki fitrat ka juz

vaada kar ke na aana bulane ke baad

More Poems

Leave a Comment