phir vahi ḳhana-e-barbad hamare liye hai
shahr-e-gharnata-o-baghdad hamare liye hai
jhelna hai hamen phir karb faramoshi ka
phir vahi silsila-e-yad hamare liye hai
niind ke shahr-e-tilismat mubarak hon tumhen
jagte rahne ki uftad hamare liye hai
gham hain ashob-e-ḳhudi men hamen varna ik shahr
ḳhuun se tar shor se abad hamare liye hai
dhunDiye aks-e-‘qamar’ raat ke a.ine men
aaj ki shab yahi irshad hamare liye hai
Leave a Reply