Zafar Ansari Zafar
mujh ko ta-umr taḌapne ki saza hi dena
tujh ko manzur agar ho to bhula hi dena
ai gham-e-hijr vo tohmat jo laga.e mujh par
meri be-laus mohabbat ki gavahi dena
ye alag baat ki ho ja.un mohabbat men tabah
tu na mujh ko kabhi ehsas-e-tabahi dena
vo jo majbur karen sharh-e-gham-e-furqat ko
ashk-amez nigahon se suna hi dena
un ke daman ko mah-o-mehr se karna ma.amur
mere hisse men jahan bhar ki syahi dena
vo javan ke kahin fitna-e-dauran na bane
husn ko fitrat-e-ma.ashuq-nigahi dena
aaj bhi yaad hai ai dost inayat teri
vo tira itna hansana ki rula hi dena
mere har sher men rudad-e-sitam hai un ki
ai ‘zafar’ meri ghazal un ko suna hi dena
Leave a Reply