Auron Ka Tha Bayan to Mauj Sada Rahe

Amjad Islam Amjad

auron ka tha bayan to mauj sada rahe

ḳhud umr bhar asir-e-lab-e-mudda.a rahe

misl-e-habab bahr-e-gham-e-hadsat men

ham zer-e-bar-e-minnat-e-ab-o-hava rahe

ham us se apni baat ka mangen agar javab

lahron ka pech-o-ḳham vo khaḌa dekhta rahe

aaya to apni aankh bhi apni na ban saki

ham sochte the us se kabhi samna rahe

gulshan men the to raunaq-e-rang-e-chaman bane

jangal men ham amanat-e-bad-e-saba rahe

surḳhi bane to ḳhun-e-shahidan ka rang the

raushan hue to mash.al-e-rah-e-baqa rahe

‘amjad’ dar-e-nigar pe dastak hi dijiye

is be-karan sukut men kuchh ghalghala rahe