tere daman ki thi ya mast hua kis ki thi
saath mere chali aa.i vo sada kis ki thi
kaun mujrim hai ki duuri hai vahi pahli si
paas aa kar chale jaane ki ada kis ki thi
dil to sulga tha magar ankhon men aansu kyuun aa.e
mil ga.i kis ko saza aur ḳhata kis ki thi
shaam aate hi utar aa.e mire gaanv men rang
jis ke ye rang the jaane vo qaba kis ki thi
ye mira dil hai ki ankhen ki sitaron ki tarah
jalne bujhne ki sahar tak ye ada kis ki thi
chandni raat ghane niim tale koi na tha
phir fazaon men vo ḳhushbu-e-hina kis ki thi
Leave a Reply