giran hai talḳhi-e-lamhat pyare
sudhar ja.enge sab halat pyare
koi ilzam kyon mujh par lagega
ghalat karta huun main kab baat pyare
main dard-o-karb men Duuba hua huun
kaTegi kis tarah se raat pyare
tire lutf-o-karam se ji raha huun
nahin varna miri auqat pyare
nahin malum is duniya ne kyon kar
laga rakhi hai mujh par ghaat pyare
miTa.en ham ghalat fahmi hai jo bhi
hain dil men kis liye ḳhadshat pyare
nahin koi maza phir zindagi ka
hue majruh jab jazbat pyare
kahan tak is tarah ‘premi’ jiyenge
baḌe hain dil-shikan halat pyare
Leave a Reply