tum harim-e-naz men baiThe ho begane bane
justuju men ahl-e-dil phirte hain divane bane
sab ko saaqi ne nahin baḳhsha dil-e-dard-ashna
jitne ahl-e-zarf the utne hi paimane bane
jalva-e-husn aur soz-e-ishq donon ek hain
sham.a ki lau thartharane hi se parvane bane
mauj-e-tufan-ḳhez uTh kar chhin le sahil ki aas
naḳhuda ke aate aate kya ḳhuda jaane bane
dam-ba-ḳhud hai tere aage e’tibar-e-aql-o-hosh
hosh vaale jab baḌhe had se to divane bane
dekh le zahid miri raushan-zamiri ki numud
ek a.ine se kitne a.ina-ḳhane bane
ai ‘figar’ afsana-e-dair-o-haram ka zikr kya
is haqiqat ke na jaane kitne afsane bane
Leave a Reply