Akhtar Ansari
lutf le le ke piye hain qadah-e-gham kya kya
ham ne firdaus banae hain jahannam kya kya
ansuon ko bhi piya jur.a-e-sahba ki tarah
saghar-o-jam bane dida-e-pur-nam kya kya
halqa-e-dam-e-vafa uqda-e-gham mauj-e-nashat
ye zamana bhi dikhata hai cham-o-ḳham kya kya
lazzat-e-hijr kabhi ishrat-e-didar kabhi
aarzu ne bhi tabi.at ko diye dam kya kya
kis kis andaz se khaTke rag-e-gul ke nashtar
tapish-afroz hue sho.ala-o-shabnam kya kya
sham-e-viran ki udasi shab-e-tira ka sukut
dil-e-mahzun ko mile hamdam o mahram kya kya
haae vo alam-e-be-nam ki jis aalam men
biit jaate hain dil-e-zar pe aalim kya kya
ismat o rif.at-e-anjum se ḳhayal aata hai
ḳhaak men rondi gai hurmat-e-adam kya kya
dab gae minnat-e-mazdur se aivan kitne
jhuk gae ghairat-e-maftuh se parcham kya kiya
the musallah gham-e-ma.ashuq se go ham ‘aḳhtar’
phir bhi dikhlae gham-e-dahr ne dam-ḳham kya kya
Leave a Reply