Wo ruKHsat Ki ghaDi Wo Dida-E-Nam Yaad Aate Hain

vo ruḳhsat kī ghaḌī vo dīda-e-nam yaad aate haiñ

na jaane aaj kyuuñ bhūle hue ġham yaad aate haiñ

ye chashm-e-dost kī sāzish nahīñ to aur phir kyā hai

ki mere mundamil zaḳhmoñ ke marham yaad aate haiñ

huā hai jab se dil said-e-sitam-hā-e-ġham-e-daurāñ

vo yaad aate to haiñ lekin bahut kam yaad aate haiñ

yahāñ ham ġham ġhalat karne ko aa.e the magar saaqī

qayāmat hai ki maiḳhāne meñ bhī ġham yaad aate haiñ

koī jab chheḌtā hai qissa-e-dār-o-rasan ‘qaisar’

to dīvānoñ ko un kī zulf ke ḳham yaad aatā hai

Leave a Comment