tuur vaale tiri tanvir liye baithe hain
ham tujhi ko but-e-be-pir liye baithe hain
jigar o dil ki na puchho jigar o dil mere
nigah-e-naz ke do tiir liye baithe hain
in ke gesu dil-e-ushshaq phansane ke liye
ja-ba-ja halqa-e-zanjir liye baithe hain
ai tiri shaan ki qatron men hai dariya jaari
zarre khurshid ki tanvir liye baithe hain
phir vo kya chiiz hai jo dil men utar jaati hai
tegh paas un ke na vo tiir liye baithe hain
mai-e-ishrat se bhare jaate hain aghyar ke jaam
ham tahi kasa-e-taqdir liye baithe hain
kishvar o ishq men muhtaj kahan hain ‘bedam’
qais o farhad ki jagir liye baithe hain
Leave a Reply