Nahin Sunta Nahin Aata Nahin Bas Mera Chalta Hai

nahin sunta nahin aata nahin bas mera chalta hai

nikal ai jaan tu hi vo nahin ghar se nikalta hai

jala huun atish-e-furqat se main ai shoala-ru yaan tak

charagh-e-khana mujh ko dekh kar har shaam jalta hai

nahin ye ashk-o-lakht-e-dil tiri ulfat ki daulat se

mira ye diida har dam laal aur gauhar ugalta hai

kisi ka saath sona yaad aata hai to rota huun

mire ashkon ki shiddat se sada gul-takiya galta hai

milata huun agar ankhen to vo dil ko churata hai

jo main dil ko talab karta huun vo ankhen badalta hai

mire pahlu-o-sina men buton ke rah gae khanjar

khuda ka fazl jis par ho to vo is tarah bahalta hai

sada hi meri qismat juun sada-e-halqa-e-dar hai

agar main ghar men jaata huun to vo bahar nikalta hai

vo bahr-e-husn shayad baagh men avega ai ‘ehsa۔n’

ki favvara khushi se aaj do do gaz uchhalta hai

Leave a Comment