Kishwar Naheed
zaḳhm bhi taaza tha aur us pe hava bhi taaza
dil ne rakkha tha magar raḳhsh-e-dua bhi taaza
tar-ba-tar hai mire hathon men vahi jamuni rang
tum ne puchha tha ki hoti hai ghaTa bhi taaza
ab talak hai vahi jalta hua sahra vahi main
ab talak hai tapish-e-shauq-e-nida bhi taaza
kis bahane se tujhe bhuul rahun aur ḳhush huun
phir bana lega ye dil ek ḳhuda bhi taaza
kis bahane se main jagun tujhe DhunDun ab ke
ab to is sahn men Thahre na hava bhi taaza
aa.ina mangta rahta hai vahi aks tira
aankh rakhti hai tira rang-e-qaba bhi taaza
bas bahut hausla rakhne ki kahani kah li
raat ko phuul masalti hai hava bhi taaza
Leave a Reply