mira vajud
dekhte hi dekhte
ek ajaib-khane men dhal raha hai
ki mere la-shuur ne
asar-e-qadima ki nadir inayaton ko
chhupa ke mujh se
mujh hi men jama kar diya hai
yahan kahin kisi rack men
mire hunut-shuda harf aur lamhe
pade hue hain
jinhen na-jane kaun sa masala laga diya gaya hai
ki mire jism ki hararat se bhi vo
gal nahin rahe hain
in almariyon se
miri tuuti hui chudiyon ke saaz ki
avaz aa rahi hai
ye dekho shelf men
meri bachpan ki gudiya ka
tuuta hua jism so raha hai
kahin meri singhar-mez ka aina
be-rang ho kar chatakh gaya hai
magar ab bhi
mere azab-lamhon ka
aks de raha hai
kahin kisi surme-dani men
shayad kabhi main ne apni aankh chhod di thi
jo us men se mujhe ghurti hai
aur meri zindagi
mere zang-alud zevaron men
dab ke chikhti hai
aur payalon ki avaz se dar rahi hai
ek tuuti hui kanghi se
mire baal uljhe hue hain
aur kinare pe rakkhi hui
surahi se pyaas ki bu
ris rahi hai
kisi ghadiyal ki tuuti hui suui
ik azab-lamhe men murtaish hai
aur qarib hi
mere jazbon ke talab se
baas uth rahi hai
aur tamash-bin,
jauq-dar-jauq mere ajaib-khane ko
dekhne ko aa rahe hain
in men se koi tamash-bin
is ajaib-khane ki
saans leti hui maut ko
tazhik se dekh kar
nazar-andaz karta hua ja raha hai
aur koi ajaibat ka shauqin
in tamam ashya pe tahqiq kar ke
apna-ap sabit karna chahta hai
magar un ko dhuul men padi hui
tarikh ki uljhi hui dor ka
koi sira nahin mil raha hai
aur men kinare pe khadi hui
apne usi ek sire ke milne ki muntazir huun
ki mira vajud dekhte hi dekhte
ek ajaib-khane men dhal chuka hai
Leave a Reply