Azhar Faragh
raat ki aghosh se manus itne ho ga.e
raushni men aa.e to ham log andhe ho ga.e
anganon men dafn ho kar rah ga.i hain ḳhvahishen
haath piile hote hote rang piile ho ga.e
bhiiḌ men gum ho ga.e ham apni ungli chhoḌ kar
munfarid hone ki dhun men auron jaise ho ga.e
zinda rahne ke liye kuchh be-hisi darkar thi
sochte rahne se bhi kuchh zaḳhm gahre ho ga.e
is liye mohtat huun apni numudari se main
phal to phal mujh peḌ ke patte bhi miThe ho ga.e
Leave a Reply