makan chhod kar la-makan dekhte hain
kahan vo hain aur ham kahan dekhte hain
taayyun ka har astan dekhte hain
jahan tum nahin ham vahan dekhte hain
utha lete hain ham bhi do-char tinke
jo bante koi ashiyan dekhte hain
qafas men asiron pe girti hai bijli
chaman se jo uthte dhuan dekhte hain
nahin dekhte kuchh magar ahl-e-mahshar
mujhe ya miri dastan dekhte hain
haqiqat men dair-o-haram ek hain jab
tujhe donon ke darmiyan dekhte hain
ye aahen hain meri ye naale hain mere
jinhen asman asman dekhte hain
dar-e-yar hai phir dar-e-yar ‘afqar’
jinan ko ba-hadd-e-jinan dekhte hain
Leave a Reply