Amjad Husain Hafiz Karnataki
dekho apni ankh-michauli ek haqiqat ho ga.i na
tum se mujh ko mujh se tum ko aaj mohabbat ho ga.i na
main ne kaha tha dhuup men mere saath na tum chal paoge
maili maili tumhari ujli chand si surat ho ga.i na
mahfil men hanste hain lekin tanha.i men rote hain
ek si meri aur tumhari ab ye halat ho ga.i na
dozaḳh men pahuncha.e baḌon ko un ke dikhave ke sajde
bachchon ko maan ki ḳhidmat se hasil jannat ho ga.i na
diid ka main bhuka huun ‘hafiz’ us ka ruḳh hai ik luqma
us ko dekha to puuri ankhon ki zarurat ho ga.i na
Leave a Reply