kya kya maze se raat ki ahd-e-shabab men
chhodun na umr-e-rafta gar aa jaae khvab men
ik dil ke vaste ye phanse vo azaab men
rahte hain apni zulf hi ke pech-o-tab men
hai shauq-e-vasl tujh se lipatta huun baar baar
varna ye mastiyan to nahin thiin sharab men
itni na kiije jaane ki jaldi shab-e-visal
dekhe hain main ne kaam bigadte shitab men
ho jaae chaak siina ki dil ghut ke mar chala
ai chara-ju kisi ko phansa mat azaab men
kar bahr o bar ki hasti-e-mauhum par nazar
thodi si khaak daal di chashm-e-pur-ab men
tab qatl-gah men qatl-e-udu ko chale hain vo
mera lahu mila ke piya jab sharab men
kin mehnaton se vasl pe raazi hue hain vo
sau nama-bar hue jo saval o javab men
akhtar-shumariyon men nikalta hai dam kahin
‘taskin’ tumhin ko dakhl nahin hai hisab men
Leave a Reply