fasl-e-bahar aai hai paimana chahiye
bulbul ke saath nara-e-mastana chahiye
ushshaq-e-shama-e-husn ko kya kya na chahiye
parvaz-e-rang ko par-e-parvana chahiye
piiri men raat din hamen paimana chahiye
rasha ke badle laghzish-e-mastana chahiye
vahshat men baat aql ki sunna na chahiye
kanon men pamba-e-kaf-e-divana chahiye
kanghi banaun chob-e-asa-e-kalim ki
taskhir mar-e-gesu-e-janana chahiye
dariya-e-vahdat-o-chaman-e-dahr se hamen
durr-e-yagana sabza-e-begana chahiye
ab-o-ghiza-e-ashiq-e-dandan muhal hai
roz ab-o-dana-e-dur-e-yakdana chahiye
main sail-e-kamal-e-junun huun mire liye
kajkol kasa-e-sar-e-divana chahiye
asrar-e-haq hain dil men magar dil hai be-khabar
is ganj ke liye yahi virana chahiye
sair-e-bahisht chahte hain nashshe men mudam
maston ko chashm-e-hur ka paimana chahiye
go be-naqab rahte ho parde men hai hijab
dar-parda ham se aap ko chhupna na chahiye
ashiq bana ke ham ko jalate hain shama-ru
parvana chahiye unhen parvana chahiye
ai pir-e-mai-farosh dar-e-tauba ki tarah
va roz-e-hashr tak dar-e-mai-khana chahiye
ta-marg ashna na hua ek sabza rang
turbat par apni sabza-e-begana chahiye
dushman hai vo to tum bhi na ho dost ai ‘munir’
apna bura na chahiye achchha na chahiye
Leave a Reply