Wo Jis Taraf Bhi muKHatib Dikhai Deta Hai

vo jis taraf bhī muḳhātib dikhā.ī detā hai

tamām shahr usī jānib dikhā.ī detā hai

na jaane karb hai kaisā mere takallum meñ

udaas merā muḳhātib dikhā.ī detā hai

ta.alluqāt kī dīvār kaise puḳhta ho

ḳhulūs ek hī jānib dikhā.ī detā hai

milā hai jis kī jabīñ par nishān-e-ḳhāk vo shaḳhs

urūj-e-zāt kā tālib dikhā.ī detā hai

Leave a Comment