Zakir Khan Zakir
sukut-e-shab men dil-e-dagh-dagh raushan hai
ki zaḳhm zaḳhm nahin hai charagh raushan hai
abhi junun salamat hai mera jan-e-ghazal
kiran kiran hai tasavvur dimagh raushan hai
ajab majaz-o-haqiqat hai ḳhitta-e-duniya
jahan pe hans to maile hain zaagh raushan hai
visal-e-yar ke lamhe hain aarzi lekin
masham-e-jan men magar sabz-bagh raushan hai
abhi hai dasht men zinda firaq-e-laila.i
agarche ḳhatm fasana suragh raushan hai
ghazal ankhen hain aisi ki kya kahun ‘zakir’
gulab chehre pe do do ayagh raushan hai
Leave a Reply