Kis Chaman Ki Khak Mein Phulon Ka Mustaqbil Nahin

Sufi

kis chaman ki ḳhaak men phulon ka mustaqbil nahin

durbin nazron men rang-o-bu hain ab-o-gil nahin

shoḳhiyan hain jis ki har jumbish men lakhon be-naqab

kyuun vo duzdida-nigahi haq-shanas-e-dil nahin

jabr sahta huun magar kab tak sahun insan huun

sabr karta huun magar dil sabr ke qabil nahin

ai havadis-ashna iza-talab dil muzda-bad

ja raha huun us taraf ab main jidhar manzil nahin

kya hua kyuun chhu ke tum ghunche ko pichhe haT gae

ye gul-e-nau-ḳhez hai mera shikasta-dil nahin

ai nigah-e-naz teri bazm men laaya huun main

aaj us dil ko jo barq-e-tur ka qaail nahin

bazm-e-husn-o-ishq men ‘akbar’ ki afsurda-dili

daad ke laaeq nahin be-dad ke qabil nahin