dil ke bahlane ki tadbir to hai
tu nahin hai tiri tasvir to hai
ham-safar chhod gae mujh ko to kya
saath mere miri taqdir to hai
qaid se chhut ke bhi kya paaya
aaj bhi paanv men zanjir to hai
kya majal un ki na den khat ka javab
baat kuchh bais-e-takhir to hai
pursish-e-hal ko vo aa hi gae
kuchh bhi ho ishq men tasir to hai
gham ki duniya rahe abad ‘shakil’
muflisi men koi jagir to hai
Leave a Reply