ujli dhuup men chalne vaalo shaad raho
mehnat kar ke palne vaalo shaad raho
ab raushan hain manzar shoḳh hain nazzare
manzar men rang bharne vaalo shaad raho
ishq mohabbat karna vaise mushkil hai
phir bhi koshish karne vaalo shaad raho
apne aap sambhalna achchhi aadat hai
Thokar Thokar girne vaalo shaad raho
haq to phir bhi haq hai ghalib aa.ega
haq ki ḳhatir laḌne vaalo shaad raho
qisse men kirdar badalte hain pal men
har kirdar men Dhalne vaalo shaad raho
apni ḳhushi se jiina mushkil hota hai
apni ḳhushi se marne vaalo shaad raho
Leave a Reply