avval avval ki dosti hai abhi
ik ghazal hai ki ho rahi hai abhi
main bhi shahr-e-vafa men nau-varid
vo bhi ruk ruk ke chal rahi hai abhi
main bhi aisa kahan ka zud-shanas
vo bhi lagta hai sochti hai abhi
dil ki varaftagi hai apni jagah
phir bhi kuchh ehtiyat si hai abhi
garche pahla sa ijtinab nahin
phir bhi kam kam supurdagi hai abhi
kaisa mausam hai kuchh nahin khulta
bunda-bandi bhi dhuup bhi hai abhi
khud-kalami men kab ye nashsha tha
jis tarah ru-ba-ru koi hai abhi
qurbaten laakh khub-surat hon
duriyon men bhi dilkashi hai abhi
fasl-e-gul men bahar pahla gulab
kis ki zulfon men tankti hai abhi
muddaten ho gaiin ‘faraz’ magar
vo jo divangi ki thi hai abhi