Shohrat Bukhari
dil saḳht niDhal ho gaya hai
saans aana muhal ho gaya hai
tu tera visal teri furqat
sab ḳhvab-o-ḳhayal ho gaya hai
vo shauq ki tha mata-e-hasti
ab ji ka vabal ho gaya hai
kya rabt hai mera roz o shab se
har lamha saval ho gaya hai
jo dard bhula diya tha tu ne
vo dard bahal ho gaya hai
ab charagari se fa.eda kya
aghaz-e-ma.al ho gaya hai
tayyar rakho charag apne
suraj ko zaval ho gaya hai
ai dil miri jaan kuchh to batla
ye kya tira haal ho gaya hai
lahore ki ahl-e-dil ki jaan tha
kuufe ki misal ho gaya hai
is alam-e-be-kasi men ‘shohrat’
jiita huun kamal ho gaya hai
Leave a Reply