Jita Hun Jo Mar Mar Ke Ye Jina to Nahin Hai

jiitā huuñ jo mar mar ke ye jiinā to nahīñ hai

duniyā mire ehsās kī duniyā to nahīñ hai

kahne ko to hai dīda-e-nargis meñ bhī jaadū

har aañkh meñ tasvīr-e-tamannā to nahīñ hai

ye husn ke jalve ye fazāoñ kā tarannum

ye shām-e-chaman shām-e-kalīsā to nahīñ hai

aayā hai dil-e-zār ko paiġhām-e-masarrat

ye bhī ġham-e-fardā kā taqāzā to nahīñ hai

yuuñ ruuTh ke jaane pe maiñ ḳhāmosh huuñ lekin

ye baat mire dil ko gavārā to nahīñ hai

har haal meñ lāzim hai mujhe pās-e-mohabbat

ye sach hai magar dil kā bharosa to nahīñ hai

bigḌe the vo jis baat pe mujh se sar-e-mahfil

ai ‘naqsh’ dil us baat ko bhūlā to nahīñ hai

Leave a Comment