badan hai sabz aur shadab lekin ruuh pyasi hai
mire andar hazaron banjh peḌon ki udasi hai
kisi ke dil se ab jazbat ka rishta nahin qaa.em
hansi bhi maslahat-amez aansu bhi siyasi hai
pa.e-iz.har kuchh aisa nahin hai jo anokha ho
har ik jazba purana hai har ik ehsas baasi hai
hamen har vaqt ye ehsas daman-gir rahta hai
paḌe hain Dher saare kaam aur mohlat zara si hai
simaT kar rah ga.i hai vus.at-e-duniya hatheli bhar
hamara mas.ala ab bhi hamari ḳhud-shanasi hai
laga huun main ‘talab’ is sach ko jhuTlane men barson se
main kal aaqa tha jis ka ab mire beTe ki daasi hai
Leave a Reply