sahir-ludhianvi

Aaj Kyun Humse Parda Hai

aaj kyuun ham se parda hai

tera har rang ham ne dekha hai

tera har Dhang ham ne dekha hai

haath khele hain teri zulfon se

aankh vaqif hai tere jalvon se

tujh ko har tarah azmaya hai

pa ke khoya hai kho ke paaya hai

ankhdiyon ka bayan samajhte hain

dhadkanon ki zaban samajhte hain

chudiyon ki khanak se vaqif hain

chhagalon ki chhanak se vaqif hain

naz-o-andaz jante hain ham

tera har raaz jante hain ham

aaj kyuun ham se parda hai

munh chhupane se faeda kya hai

dil dukhane se faeda kya hai

uljhi uljhi laten sanvar ke aa

husn ko aur bhi nikhar ke aa

narm galon men bijliyan le kar

shokh ankhon men titliyan le kar

aa bhi ja ab ada se lahrati

ek dulhan ki tarah sharmati

tu nahin hai to raat suuni hai

ishq ki kaenat suuni hai

marne valon ki zindagi tu hai

is andhere ki raushni to hai

aaj kyuun ham se parda hai

aa tira intizar kab se hai

har nazar be-qarar kab se hai

shama rah rah ke jhilmilati hai

saans taron ki Duubi jaati hai

tu agar mehrban ho jaae

har tamanna javan ho jaae

aa bhi ja ab ki raat jaati hai

ek ashiq ki baat jaati hai

khair ho teri zindagani ki

bhiik de de hamen javani ki

tujh pe sau jaan se fida hain ham

ek muddat ke ashna hain ham

aaj kyuun ham se parda hai

More Poems

Leave a Comment