Ek Raste Ki Kahani Jo Suni Pani Se

ek raste kī kahānī jo sunī paanī se

ham bhī is baar nahīñ bhāge pareshānī se

merī be-jān sī āñkhoñ se Dhalakte aañsū

ā.īna dekh rahā hai baḌī hairānī se

mere andar the hazāroñ hī akele mujh se

maiñ ne ik bhiiḌ nikālī isī vīrānī se

maat khaa.e hue tum baiThe ho dānā.ī se

jiit ham le ke chale aa.e haiñ nādānī se

varna miTTī ke ghaḌe jaise badan haiñ saare

ma.arke sar hue sab jur.at-e-īmānī se

ā.īna chupke se manzar vo churā letā hai

tū sajātā hai badan jab kabhī uryānī se

Leave a Comment