chishti ne jis zamin men paigham-e-haq sunaya
nanak ne jis chaman men vahdat ka giit gaaya
tatariyon ne jis ko apna vatan banaya
jis ne hijaziyon se dasht-e-arab chhudaya
mera vatan vahi hai mera vatan vahi hai
yunaniyon ko jis ne hairan kar diya tha
saare jahan ko jis ne ilm o hunar diya tha
mitti ko jis ki haq ne zar ka asar diya tha
turkon ka jis ne daman hiron se bhar diya tha
mera vatan vahi hai mera vatan vahi hai
tuute the jo sitare faras ke asman se
phir taab de ke jis ne chamkae kahkashan se
vahdat ki lai suni thi duniya ne jis makan se
mir-e-arab ko aai thandi hava jahan se
mera vatan vahi hai mera vatan vahi hai
bande kalim jis ke parbat jahan ke siina
nuh-e-nabi ka aa kar thahra jahan safina
rifat hai jis zamin ki bam-e-falak ka ziina
jannat ki zindagi hai jis ki faza men jiina
mera vatan vahi hai mera vatan vahi hai
Leave a Reply