kahan hai tu kahan hai aur main huun
anal-haq ka bayan hai aur main huun
lab-e-jan-bakhsh-e-janan ka huun kushta
hayat-e-javidan hai aur main huun
visal-e-daimi ka hai tasavvur
bahar-e-be-khizan hai aur main huun
nahin har ik ko is maikhane men baar
bas ik pir-e-mughan hai aur main huun
maza deta hai tanhai men rona
ki ik dariya ravan hai aur main huun
utha do din ko aur shab ko ba-dastur
ye sang-e-astan hai aur main huun
tahammul ki nahin ab taab zinhar
nabard-e-asman hai aur main huun
gul-e-gulchin kahan fasl-e-khizan men
purana ashiyan hai aur main huun
shab-e-hijran men ho kaun aur dam-saz
faqat ik qissa-khvan hai aur main huun
vilayat ka safar mushkil hai ‘nazim’
yahi hindostan hai aur main huun
Leave a Reply