Ehsan Danish
kal raat kuchh ajiib saman gham-kade men tha
main jis ko DhunDhta tha mire aa.ine men tha
jis ki nigah men thiin sitaron ki manzilen
vo mir-e-ka.enat usi qafile men tha
rahgir sun rahe the ye kis jashn-e-nau ka shor
kal raat mera zikr ye kis silsile men tha
raqsan the rind jaise bhanvar men shafaq ke phuul
jo paanv paḌ raha tha baḌe qa.ede men tha
chhiḌka jise adam ke samundar pe aap ne
sahra tamam ḳhaak ke us bulbule men tha
mannat-guzar-e-ahl-e-havas ho saka na dil
haa.il mira zamir mire raste men tha
hai farz is ata-e-junun ka bhi shukriya
lekin ye be-shumar karam kis sile men tha
ab aa ke kah rahe ho ki rusva.i se Daro
ye baal to kabhi ka mire a.ine men tha
sunta huun sar-nigun the farishte mire huzur
main jaane apni zaat ke kis marhale men tha
hain sabt mere dil pe zamane ki Thokaren
main ek sang-e-rah tha jis raste men tha
kuchh bhi na tha azal men ba-juz sho.ala-e-vajud
haan duur tak adam ka dhuan hashiye men tha
main ne jo apna naam pukara to hans paḌa
ye mujh sa kaun shaḳhs mire raste men tha
thi nuqta-e-nigah tak azadi-e-amal
parkar ki tarah main ravan da.ere men tha
zanjir ki sada thi na mauj-e-shamim-e-zulf
ye kya tilism un ke mire fasle men tha
ab ruuh e’tiraf-e-badan se hai munharif
ik ye bhi sang-e-mil mire raste men tha
‘danish’ ka.i nasheb-e-nazar se guzar ga.e
har rind aa.ine ki tarah mai-kade men tha
Leave a Reply