Jameel Yusuf
ḳhud apni zaat ka nam-o-nishan bhuul ga.e
riha hue to parinde uḌaan bhuul ga.e
is inhimak se kar-e-zamin men mahv hue
zamin pe chhaya hua asman bhuul ga.e
har imtihan men pahla sabaq to yaad aaya
kitab-e-ishq kahin darmiyan bhuul ga.e
na Thaharna hi munasib na uTh ke jaana hi
bala ke ghar men hamen mezban bhuul ga.e
us ajnabi ki rifaqat men aisi ḳhushbu thi
ham apne saare safar ki thakan bhuul ga.e
na kar numud ki ḳhvahish ki ye jahan vaale
baḌe-baḌon ka bhi nam-o-nishan bhuul ga.e
kuchh is tarah gham-e-umr-e-ravan ne ḳhaak kiya
firaq-o-vasl ki sab dastan bhuul ga.e
Leave a Reply