nazar men koi manzil hai na jaada chahta huun
safar chahe koi ho be-irada chahta huun
ḳhushi ka kya ḳhushi men chahe kuchh taḳhfif kar do
mata-e-gham ziyada se ziyada chahta huun
mira mafhum asani se khul jaa.e jahan par
main apna lahja-e-izhar saada chahta huun
miri nazron ko vus.at do-jahan ki dene vaale
main daman-e-taḳhayyul bhi kushada chahta huun
qayadat mujh pe nazan thi kabhi manzil-ba-manzil
aur ab ḳhud hi qayadat jaada jaada chahta huun
bahut talḳhi bhare halat men jiina paḌa hai
isi talḳhi ki ḳhatir talḳh baada chahta huun
main ḳhud pahunchun ki mere qadmon men chali aa.i
ba-har-surat main takmil-e-irada chahta huun
musalsal chahiye ki baat hai aur barmala hai
saval is ka nahin kam ya ziyada chahta huun
jahan-e-tang ki tangi se mera kya ilaqa
vasi-ul-qalb huun duniya kushada chahta huun
tire daman-kashan rahne ka matlab kya hai mujh se
yahi to hai ki main tujh ko ziyada chahta huun
alag tashkil dena chahta huun apni manzil
‘vaqar’ apne liye maḳhsus jaada chahta huun
Leave a Reply