Ye Qadam Qadam Kashakash Dil Be-Qarar Kya Hai

ye qadam qadam kashakash dil be-qarar kya hai

jo yaqin na ho amal par to nashat-e-kar kya hai

ba-ḳhuda nasim-e-gulshan tiri vahshaton ke sadqe

ye mizaj-e-nama-bar hai to mizaj-e-yar kya hai

vo karam na ho sitam ho koi baat kam se kam ho

ye ada-e-be-niyazi mire gham-gusar kya hai

ye ham ahl-e-gham ki manzil hai dabe qadam guzar ja

ki ajal yahan ke fitnon men tira shumar kya hai

abhi aa ke naghma-e-dil ki bahar dekh jaao

main nava-e-ḳhud-shikan huun mira e’tibar kya hai