halat par nigah ruton par nazar na thi
jab tak rahe chaman men chaman ki ḳhabar na thi
ḳhud apne ghar ko aag dikha.i thi aap ne
is men to koi sazish-e-barq-o-sharar na thi
rudad-e-tira-baḳhti-e-ahbab kya kahen
un ke liye sahar bhi tulu-e-sahar na thi
fasl-e-bahar men tar-o-taza nahin hava
shayad shajar ko ḳhvahish-e-barg-o-samar na thi
TuuTi hui umiid shikasta the hausle
dil ki tabahiyon pe magar aankh tar na thi
dasht-e-talab men itne andhere the kargar
raḳhshanda ik kiran bhi sar-e-rahguzar na thi
phir kyuun suna diya tha adalat ne faisla
‘shahid’ miri gavahi agar mo’atabar na thi
Leave a Reply