shab-o-roz raqs-e-visal tha so nahin raha
kabhi tujh ko mera ḳhayal tha so nahin raha
vo jo be-qarari-e-jan-o-dil thi nahin rahi
vo jo hijr tera muhal tha so nahin raha
kabhi aankh men jo muravvaten thiin fana huiin
pas-e-chashm ashk-e-malal tha so nahin raha
ye to e’tiraf-e-shikast hai ki mazid ab
koi mahram-e-mah-o-sal tha so nahin raha
vo ki chand jis pe kabhi ghurub nahin hua
yahan ik vo shahr-e-jamal tha so nahin raha
mujhe aisa lagta hai jaise aankh se ḳhvab ka
vo jo rabta sa bahal tha so nahin raha
mujhe qatl kar ke mo.amla nahin hoga ḳhatm
ki jo qatl pahle kamal tha so nahin raha
mira e’tibar adam vajud se uth gaya
vo jo zindagi ki misal tha so nahin raha
shab-e-mahtab men raat ghatne ke saath saath
jo samundaron men ubaal tha so nahin raha
hai ajab mashaqqat-e-vasl jis ki thakan se qabl
ye badan thakan se niDhal tha so nahin raha